Përplasjet verbale në mes të dy blloqeve politike shqiptare në Maqedoninë e Veriut, po vazhdojnë, ndonëse fushata zgjedhore ende nuk ka filluar zyrtarisht. Në fokusin e këtyre përplasjeve është edhe ndikimi i politikës dhe ekonomisë serbe në Maqedoni.
BDI sot ka dalur me një komunikatë në të cilën e akuzon koalcionin VLEN se ka hapur dyert për depërtimin e ‘botës serbe’ përmes sektorit bankar në Maqedoni.
“VLEN premtoi në programin e saj zgjedhor të vitit 2024 të krijojë një bankë shqiptare me kapital dominues shqiptar, si garanci për fuqizimin ekonomik të shqiptarëve dhe zhvillimin e balancuar rajonal. Sot, në vend që ta përmbushë këtë premtim, si shërbëtor i VMRO-së, VLEN ka hapur dyert për depërtimin e “botës serbe” në sektorin bankar të Maqedonisë përmes “Alta Bankës”, deklaron BDI.”
Ky nuk është një investim i zakonshëm financiar, por një projekt i drejtpërdrejtë politik dhe ekonomik i Beogradit për të marrë kontrollin e institucioneve strategjike të shtetit. Banka nuk është vetëm një kompani private – është një mekanizëm për ndikim politik, pastrim kapitali dhe krijim varësie ekonomike të vendit nga interesat e Serbisë.
Faktet janë të qarta:
- Emërimi i Maja Kadievska Vojnoviç, një ish-anëtare e VMRO-së, në krye të bankës është rezultat i lobimit personal të Mickoskit ndaj Vuçiçit.
- Profesionistët e sektorit financiar kanë paralajmëruar për rrezikun për reputacionin e vendit para BE-së dhe institucioneve ndërkombëtare – qeveria dhe institucionet e sigurisë heshtin.
- Presidentja dhe kabineti i saj po e relativizojnë problemin, duke e paraqitur atë si një investim “normal”, megjithëse të gjithë e dinë se është një instrument politik i “Botës Serbe”.
Në vend që të garantojnë kapitalin shqiptar dhe zhvillimin e balancuar ekonomik siç premtuan, VLEN dhe partnerët e tyre po ia dorëzojnë sektorin bankar – zemrën e ekonomisë – në duart e Beogradit.
Kjo nuk është një çështje ekonomike, por një çështje sigurie kombëtare. Një bankë serbe do të thotë ndikim serb në kredi, biznese dhe vendimmarrje financiare në vend. Kjo do të thotë kontroll i sektorëve strategjikë dhe dobësim i orientimit euroatlantik.
VLEN gënjen në çdo hap:
- Ata premtuan një bankë shqiptare, sollën një bankë serbe.
- Ata premtuan integrimin evropian, ata sollën “Botën Serbe” dhe ndikimin rus.
- Ata premtuan vendimmarrje të pavarur, sollën varësi nga Vuçiç dhe Beogradi.
BDI thekson edhe një herë se Maqedonia nuk duhet dhe nuk duhet të lejojë që sektori bankar dhe institucionet strategjike të merren nga interesat destabilizuese të Beogradit. Integriteti financiar dhe orientimi euroatlantik nuk janë objekt negociatash. Heshtja është bashkëfajësi.
Tetori po vjen – dhe do të jetë një referendum kombëtar për t’i thënë “Jo” GËNJESHTRAVE, “Jo” varësisë nga Beogradi dhe “Po” përfaqësimit dinjitoz, të ndershëm dhe efektiv{, thuhet në komunikatën e BDI-së.