Një studim i Harvardit ka zbuluar se sasia e kafeinës që pini gjatë gjithë ditës është një parashikues i shëndetit dhe jetëgjatësisë tek gratë.
Një studim i ri me gati 50,000 gra mbi moshën 30 vjeç i shton peshë dekadave të tëra kërkimesh mbi përfitimet shëndetësore të kafesë. Konsumi i rregullt i kafesë dihet se ka efekte pozitive në shëndetin e zemrës dhe jetëgjatësinë, dhe tani kjo njohuri është thelluar më tej.
Dr. Sarah Mahdavi, një studiuese në Harvard, zbuloi se pirja e kafesë mund të kontribuojë edhe në plakjen e shëndetshme tek gratë.
“Rezultatet sugjerojnë që kafeja me kafeinë, ndryshe nga çaji ose kafeja pa kafeinë, mund të mbështesë në mënyrë unike rrugët e plakjes që ruajnë funksionin mendor dhe fizik”, tha Mahdavi, një bashkëpunëtore në Shkollën e Shëndetit Publik T.H. Chan të Harvardit.
Studimi, i prezantuar në takimin vjetor të Shoqërisë Amerikane për Ushqyerjen, nuk është botuar ende ose rishikuar nga kolegët.
Megjithatë, studiuesit thonë se gjetjet e tyre janë të forta.
Studimi ndoqi një grup të madh prej 47,000 grash gjatë disa dekadave, duke filluar nga viti 1984. U analizuan të dhënat e tyre shëndetësore dhe zakonet e pirjes së kafesë.
Deri në vitin 2016, vetëm 3,706 pjesëmarrëse konsideroheshin si “të plakura shëndetshëm”. Kriteret për përcaktimin e plakjes së shëndetshme ishin:
- Mosha 70 vjeç ose më e vjetër,
- Mungesa e 11 sëmundjeve kronike, duke përfshirë sëmundjet e zemrës, diabetin e tipit 2 dhe kancerin,
- Raportimi i shëndetit mendor pozitiv,
- Aftësia për të ruajtur funksionin fizik,
- Mungesa e problemeve të kujtesës ose dëmtimit njohës.
Hulumtuesit gjithashtu morën në konsideratë dhe i përshtatën rezultatet për faktorë të tjerë të stilit të jetës, siç janë pirja e duhanit, frekuenca e ushtrimeve dhe dieta.
Pjesëmarrësve iu pyetën gjithashtu se sa shpesh pinin kafe, çaj dhe Coca-Cola ose Pepsi (të gjitha këto mund të jenë burime kafeine).
Studimi zbuloi se gratë që pinin të paktën një filxhan kafe në ditë kishin më shumë gjasa të ishin midis atyre që plakeshin shëndetshëm.
Për më tepër, tek gratë që plakeshin shëndetshëm, çdo filxhan kafe shtesë në ditë shoqërohej me një shans prej 2 deri në 5 përqind më të madh për t’u plakur mirë, duke arritur kulmin në rreth pesë filxhanë të vegjël në ditë.
Shkurt, studimi i madh zbuloi se pirja e përditshme e kafesë mund të lidhet me plakjen e shëndetshme tek gratë, edhe pasi të merren parasysh zakonet e tjera të jetesës.