Mjaft më me ecje të shkujdesura në rrugë me kufje ose duke folur në celular gjatë kalimit të rrugës. Gjoba janë parashikuar edhe për çiklistët që mbajnë kufje ose flasin në celular gjatë ngasjes.
Qeveria ka paraqitur në Parlament ndryshime në Ligjin për sigurinë në trafikun rrugor, i cili prezanton ndryshime rigoroze për këmbësorët, çiklistët dhe drejtuesit e triçikletave elektrike.
“Një këmbësor është i detyruar, kur lëviz në një rrugë sipas kushteve të përcaktuara nga ky ligj ose kur kalon rrugën dhe shtegun e biçikletave ose korsinë e biçikletave, të lëvizë dhe të kalojë me kujdes, pa përdorur pajisje elektronike, siç janë kufjet në të dy veshët, një telefon celular, tablet, orë inteligjente ose një lloj tjetër pajisjeje elektronike, e cila do të zvogëlonte vëmendjen e tij gjatë kalimit të rrugës dhe shtegut të biçikletave ose korsisë së biçikletave”, thuhet në projekt-amendamentet.
Nëse policia ndalon këmbësorin, ai do të gjobitet me 40 euro në ekuivalent denarësh.
Gjoba janë parashikuar edhe për çiklistët që mbajnë kufje ose flasin në celular gjatë ngasjes. Për ta, gjoba është 10 euro më e lartë se për këmbësorët.
“Shoferi i biçikletës, biçikletës me motor ndihmës, mopedit, motoçikletës, triçikletës, katërçikletës së lehtë dhe katërçikletës, gjatë drejtimit të mjetit, nuk mund të përdorë pajisje elektronike, siç janë kufjet në të dy veshët, telefoni celular, tableti, ora inteligjente ose çdo lloj tjetër pajisjeje elektronike, e cila do të zvogëlonte aftësinë për të reaguar dhe për të drejtuar mjetin në mënyrë të sigurt, përveç pajisjeve të specializuara të komunikimit që janë të integruara në helmeta mbrojtëse. Një procesverbal për kundërvajtje rrugore me urdhër pagese për kundërvajtje me gjobë në shumën prej 50 eurosh në ekuivalent denarësh do t’i lëshohet, në përputhje me dispozitat e këtij ligji, shoferit që vepron në kundërshtim me dispozitat e paragrafit (1) të këtij neni”, thuhet në projekt-amendamentet.
Të njëjtat dënime parashikohen edhe për shoferët e skuterëve elektrikë që përdorin kufje, telefona ose çdo lloj pajisjeje elektronike.
Këto ndryshime vijnë së bashku me ato për “Qytetin e Sigurt” – një sistem që fillimisht do të funksionojë në Shkup, Tetovë dhe Kumanovë, dhe deri në mesin e vitit 2026, pritet të funksionojë në të gjithë vendin.