Kandidati i VLEN-it për Çairin, Izet Mexhiti, ka paralajmëruar se një nga prioritetet e vitit të parë të mandatit do të jetë shndërrimi i rrugës “Mid’hat Frashëri” (ish “Brigada Maqedono-Kosovare”) në një bulevard bashkëkohor, në bashkëpunim me qytetin e Shkupit.
Projekti parashikon një gjatësi prej 1.850 metrash dhe profil prej 25 metrash, me 4 korsi, shtigje për biçikleta e këmbësorë, si dhe gjelbërim ndërmjet korsive. Bulevardi synon të ofrojë më shumë siguri, funksionalitet dhe estetikë për banorët, duke ulur vonesat dhe rritur efikasitetin e transportit urban.
“Ky bulevard do të lidhet drejtpërdrejt me rrugën ‘Xhon Kenedi’, duke lehtësuar qasjen e studentëve drejt universiteteve dhe duke forcuar lidhjen mes Çairit, Shuto Orizarës dhe Qendrës së Shkupit”, tha Mexhiti.
Ai shtoi se në fazën e ardhshme është planifikuar edhe shndërrimi i rrugës “Xhon Kenedi” në bulevard, duke krijuar një qark të ri urban, funksional dhe bashkëkohor për të gjithë qytetarët e kryeqytetit.