Tre persona humbën jetën rreth orës 16:00 në autostradën Tetovë – Shkup. Sipas informacioneve fillestare nga Shërbimi i Sigurisë Publike të Tetovës, ka pasur një përplasje midis një automjeti Opel me targa të Tetovës dhe një autobusi.
“Dy persona, një burrë dhe një grua, vdiqën në vendngjarje, ndërsa një grua vdiq në Spitalin Klinik në Tetovë, ku edhe një fëmijë i lënduar u dërgua për të marrë ndihmë mjekësore”, thuhet në informacionin fillestar nga SPB të Tetovës.
Prokurori publik, zjarrfikësit dhe policia ndodhen në vendin e ngjarjes për të kryer hetime. SPB e Tetovës do të del me informacione më të hollësishme pasi të dokumentohet rasti. Ndërkohë, nga Zyra e Prokurorit Publik ka mbërritur një deklaratë:
“Një prokuror publik në detyrë nga Zyra e Prokurorisë Publike Themelore të Tetovës ka inspektuar një vend në autostradën për në Shkup, ku sot pasdite ka ndodhur një aksident i rëndë trafiku, në të cilin kanë vdekur tre persona dhe është plagosur një fëmijë. Sipas gjetjeve fillestare, aksidenti ka ndodhur kur një makinë dhe një autobus janë përplasur, dhe makina në të cilën udhëtonin tre të ndjerit dhe fëmija i plagosur ka dalë nga rruga. Po ndërmerren të gjitha veprimet për të hetuar shkaqet dhe rrethanat që kanë çuar në kontaktin midis automjeteve dhe aksidentit. Prokurori publik ka lëshuar një urdhër për autopsi të të ndjerëve, dhe është urdhëruar ekzaminimi i shoferit të autobusit për praninë e mundshme të alkoolit ose substancave të tjera. Automjetet janë sekuestruar për një inspektim teknik të gjendjes së tyre në kohën e përplasjes. Për të sqaruar plotësisht situatën e trafikut në vendngjarje, është thirrur edhe një ekspert në fushën e trafikut, dhe përveç kësaj, do të përgatitet një raport i plotë i ekspertizës teknike të trafikut bazuar në gjurmët e mbledhura në vendngjarje, dokumentacionin fotografik dhe provat e tjera”, thuhet në deklaratë.