Departamenti Amerikan i Shtetit ka miratuar shitjen e mundshme të Sistemit Bregdetar të Mbrojtjes Kundër Raketave (NOMADS) dhe pajisjeve përkatëse Bullgarisë, me vlerë afërsisht 620 milionë dollarë (rreth 530 milionë euro), njoftoi Pentagoni.
Sistemi i mbrojtjes ajrore do të sigurohet nga Kongsberg Defense, një furnizues kryesor norvegjez i sistemeve të mbrojtjes dhe në pronësi të qeverisë norvegjeze, thuhet në një deklaratë të Pentagonit, e publikuar nga Reuters
NOMADS është një sistem i lëvizshëm i mbrojtjes ajrore për vendosje më afër dhe në vijën e frontit, dhe përdoret për t’u mbrojtur nga dronë dhe raketa lundrimi.
Sistemi i raketave të mbrojtjes ajrore NOMADS përbëhet nga një modul mbrojtjeje ajrore me rreze të shkurtër veprimi i montuar në një automjet të mekanizuar të blinduar ACSV G5 me lëvizshmëri të lartë jashtë rrugës.
Ky modul integron funksionet dhe aplikacionet kryesore të komandës dhe kontrollit nga sistemi i raketave të mbrojtjes ajrore me rreze të mesme veprimi NASAMS dhe përfshin një raketë me një kërkues pasiv IR të tipit Sidewinder ose IRIS-T SLS dhe një radar AESA të tipit Xenta-M.
Përveç kësaj, është i pajisur me një kamerë ditë-natë dhe termike dhe një telemetër lazer. Mund të pajiset gjithashtu opsionalisht me një bllokues drejtimi me frekuencë radioje.