Hoteli në veri të Polonisë, i cili ka qenë në ndërtim e sipër për shtatë vjet dhe që shumë e quajnë “Dubai polak”, më në fund duhet të hapë dyert e tij deri në fund të vitit 2025 pas problemeve të shumta administrative.
Hotel Golebiewski, i vendosur në qytetin Pobierowo, ka gjithsej 13 kate dhe do të jetë hoteli më i madh i këtij lloji në Poloni. Me pamjen e tij, hoteli ka transformuar ndjeshëm peizazhin e bregdetit të Detit Baltik dhe është tashmë një atraksion i vërtetë për turistët.
Objekti u ndërtua në një truall prej 30 hektarësh që më parë ishte në pronësi të Njësisë së Raketave të Mbrojtjes Ajrore. Siç është raportuar më parë në mediat polake, rreth 1,500 pemë duhej të priteshin për të filluar ndërtimin e këtij objekti.
Investitori mori përsipër të mbjellë pemë të reja në zonën përreth objektit. Edhe pse vetë hoteli nuk është hapur ende, ai është tashmë një atraksion turistik. Turistët e duan ta fotografojnë atë, duke bërë devijime të gjata për ta parë nga plazhi. Nga larg, ai i ngjan një trageti masiv pasagjerësh turistik ose një anijeje oqeanike.
Edhe pse hoteli fillimisht duhej të hapej në vitin 2021, kjo nuk ndodhi. Janë përmendur arsye të ndryshme, duke përfshirë pandeminë dhe largimin e punëtorëve të ndërtimit nga Ukraina. Për më tepër, Tadeusz Golebiewski, themeluesi dhe pronari i rrjetit të hoteleve, ndërroi jetë në qershor 2022.
Sipas detajeve të projektit, hoteli do të ketë 1,200 dhoma dhe do të jetë në gjendje të akomodojë mbi 3,000 mysafirë. Madhësia mesatare e dhomave është afërsisht 60 metra katrorë, dhe 80 përqind e tyre kanë pamje nga deti. Sipërfaqja totale e ndërtesës është 180,000 metra katrorë. Do të jetë hoteli më i madh në zinxhirin Golębiewski dhe më i madhi i këtij lloji në Poloni.
Siç u njoftua gjatë fazës së ndërtimit, hoteli do të ketë spa-në e vet, restorante, pub, kafene publike, dy salla teatri dhe kinemaje, si dhe ambiente konferencash dhe pishina të jashtme dhe të brendshme, duke krijuar një park ujor të madh. Do të ketë gjithashtu fusha basketbolli dhe volejbolli, fusha tenisi, mure ngjitjeje dhe 16 salla konferencash.