Nga 12 tetori, shumica e shteteve anëtare të Bashkimit Evropian do të fillojnë gradualisht të zbatojnë sistemin e ri të hyrjes/daljes (EES), i cili përfshin regjistrimin dixhital të të gjithë udhëtarëve nga jashtë BE-së që hyjnë në zonën Shengen për një qëndrim të shkurtër deri në 90 ditë.
Nëse deri më tani shqetësimet tuaja kryesore kur shkoni në një udhëtim ishin nëse kishit me vete pasaportën, paratë dhe biletën e avionit, së shpejti do të keni më shumë detyrime.
Shumica e shteteve anëtare të Bashkimit Evropian (BE) dhe katër vende të tjera evropiane do të fillojnë gradualisht një procedurë të re për qytetarët e huaj që duan të kalojnë kufijtë e saj të jashtëm nga 12 tetori 2025, njoftoi Komisioni Evropian.
Kjo do të thotë që nga mesi i tetorit, në vend të vulosjes manuale të mëparshme, do të futet regjistrimi dixhital për të gjithë udhëtarët nga jashtë BE-së që hyjnë në zonën Shengen për një qëndrim të shkurtër deri në 90 ditë.
Nëse dikush kalon kufirin për herë të parë, pra hyn në zonën Shengen që nga futja e Sistemit të Hyrjes/Daljes (EES), ai do të duhet t’u japë të dhëna personale oficerëve të kontrollit kufitar.
Ata do të skanojnë gjurmët e gishtërinjve të pasagjerit dhe do të bëjnë një foto.
Ky informacion do të regjistrohet në një skedar dixhital.
Pasaporta e pasagjerit – biometrike ose jo-biometrike – nuk do të vuloset.
Cilat vende po e prezantojnë sistemin e ri?
Gjithsej 29 vende evropiane.
Do të zbatohet për të gjithë anëtarët e BE-së përveç Republikës së Irlandës dhe Qipros, si dhe Lihtenshtajnit, Norvegjisë, Islandës dhe Zvicrës.
Kushdo që e kalon këtë sistem një herë, nuk do të duhet të japë më të dhëna personale kur të rihyjë, pasi gjurmët e gishtërinjve dhe fotografitë do të mbeten të regjistruara në sistemin EES dhe oficerët e kontrollit kufitar vetëm do t’i kontrollojnë ato, shkruan faqja e internetit e EES.
Në raste të rralla, mund të jetë e nevojshme të mblidhen dhe të regjistrohen të dhënat e dikujt përsëri.
Rregulloret do të zbatohen për udhëtarët nga 59 vende, duke përfshirë vendet e Ballkanit Perëndimor: Serbia, Mali i Zi, Bosnja dhe Hercegovina, Maqedonia e Veriut dhe Shqipëria, sipas faqes së internetit të BE-së.
Do të zbatohet gjithashtu për udhëtarët nga Amerika, Australia, Britania e Madhe, Japonia, Brazili, Argjentina dhe disa vende të tjera.
Vendet evropiane do ta prezantojnë gradualisht sistemin në kufijtë e tyre të jashtëm.
Kjo do të thotë që mbledhja e të dhënave do të futet gradualisht në pikat kufitare, me zbatim të plotë deri më 10 prill 2026.
EES regjistron automatikisht:
Të dhënat e pasaportës (emri, numri i pasaportës, data e lindjes)
Të dhënat biometrike: gjurmët e gishtërinjve dhe fotografia e fytyrës
Data dhe vendi i hyrjes dhe daljes nga zona Shengen
Informacion nëse udhëtari ka tejkaluar qëndrimin e tij/saj të lejuar, si dhe nëse udhëtarit i është refuzuar më parë hyrja
Kushdo që refuzon të japë të dhëna biometrike do t’i refuzohet hyrja në vendet evropiane që përdorin sistemin EES