Maqedonia dhe Bullgaria kanë rënë dakord të finalizojnë kontratën për ndërtimin e një tuneli hekurudhor midis Gjueshevës dhe Deve Bairit deri në fund të korrikut, duke hapur rrugën që punimet e ndërtimit të fillojnë në vitin 2026.
Shkup, 18 korrik – Maqedonia dhe Bullgaria janë një hap më afër realizimit të projektit të përbashkët për ndërtimin e një tuneli hekurudhor ndërkufitar midis Gjueshevës dhe Deve Bairit, si pjesë e përfundimit të segmentit lindor të Korridorit 8. Në një takim në Bruksel, të dyja palët ranë dakord të finalizojnë tekstin e marrëveshjes ndërqeveritare deri në fund të korrikut, i cili do të përcaktojë aspektet teknike, financiare dhe operative të projektit, njofton DW.
Në takimin e organizuar nga Komisioni Evropian, morën pjesë përfaqësues të lartë nga institucionet e transportit të të dy vendeve, përfshirë Sekretarin Shtetëror të Ministrisë së Transportit të Maqedonisë, Stefan Volkanovski, dhe Drejtorin e PE Infrastrukturës Hekurudhore, Sinisa Ivanovski, si dhe Zëvendës Ministrin e Transportit të Bullgarisë, Ljuben Nanov. Përfaqësues nga Banka Evropiane e Investimeve dhe Komuniteti i Transportit ishin gjithashtu të pranishëm.
Tender i ri për pjesën pranë Kriva Palankës
Marrëveshja, nënshkrimi i së cilës pritet këtë vjeshtë, do të lejojë që punimet e ndërtimit në tunel të fillojnë në gjysmën e parë të vitit 2026. Tuneli do të ndërtohet sipas projektit teknik ekzistues të përgatitur nga pala maqedonase, dhe të dy vendet do të formojnë grupe pune për zbatimin e tij.
Maqedonia u zotua të rishpallë tenderin për seksionin e Kriva Palankës – hyrja në tunel deri në fund të vitit 2025, ndërsa Bullgaria prezantoi aktivitetet e saj në territorin e vet.
Të dyja palët shprehën gatishmërinë e tyre për të aplikuar së bashku për mbështetje financiare nga BE-ja dhe partnerët ndërkombëtarë, me qëllim sigurimin e fondeve për zbatimin e këtij projekti strategjik.
Të dy vendet e kanë akuzuar vazhdimisht njëra-tjetrën në muajt e fundit për bllokimin e projektit për ndërtimin e hekurudhës në Korridorin 8. Ministri maqedonas i Transportit, Aleksandar Nikoloski, akuzoi Bullgarinë në prill se “nuk donte të ndërtonte hekurudhën”.
Nga ana tjetër, zëvendëskryeministri dhe ministri i transportit bullgar Grozdan Karadzov u përgjigj se Bullgaria tashmë po punon në hekurudhën në të cilën, deri në vitin 2032, trenat do të ecin me 160 kilometra në orë, ndërsa nga ana tjetër, nuk po bëhet asgjë.
Korridori 8, i cili lidh Adriatikun me Detin e Zi përmes Shqipërisë, Maqedonisë dhe Bullgarisë, është pjesë e korridorit më të gjerë evropian të transportit Ballkani Perëndimor – Mesdheu Lindor dhe ka mbështetje të fortë nga Bashkimi Evropian./ GazetaFAKTI