Kryeministri izraelit Benjamin Netanyahu ka urdhëruar ushtrinë të nisë sulme intensive në Rripin e Gazës, pasi akuzoi Hamasin për shkelje të një armëpushimi të ndërmjetësuar nga SHBA-ja.
“Pas konsultimeve për sigurinë, Kryeministri Netanyahu ka urdhëruar ushtrinë të nisë menjëherë sulme të forta në Rripin e Gazës”, tha zyra e tij në një deklaratë.
Më herët sot, ministrat e ekstremit të djathtë izraelitë i bënë thirrje Kryeministrit Benjamin Netanyahu të veprojë për të siguruar shkatërrimin e Hamasit.
Deklaratat e tyre erdhën pasi autoritetet izraelite thanë se eshtrat e kthyera nga Hamasi mbrëmë i përkisnin një pengu që ishte varrosur tashmë në Izrael, dhe jo asnjërit prej 13 pengjeve të ndjerë që ndodhen ende në Gaza.
“Fakti që Hamasi vazhdon të luajë lojëra dhe të mos dorëzojë menjëherë të gjithë trupat e të vdekurve tanë është në vetvete provë se organizata terroriste ende ekziston”, tha Ministri i Sigurisë Kombëtare Itamar Ben Gvir, sipas ‘The Times of Israel’.
“Tani duhet ta zhveshim Hamasin nga vetë ekzistenca e tij dhe ta shkatërrojmë plotësisht, një herë e përgjithmonë, në përputhje me objektivin qendror të ‘Luftës së Ringjalljes’.
Z. Kryeministër, mjaft me hezitimin. Jepni urdhrin”, theksoi ai.
Izraeli e informoi administratën e Presidentit të SHBA-së, Donald Trump, për vendimin e tij për të nisur sulme në Qytetin e Gazës në përgjigje të “shkeljeve të armëpushimit” nga Hamasi vetëm pasi kryeministri izraelit Benjamin Netanyahu urdhëroi veprimin, tha zyra e Netanyahut për ‘The Times of Israel’.
“Kryeministri mori vendimin për të kryer sulmin, i dha ushtrisë urdhrin për ta kryer atë dhe më pas informoi Shtetet e Bashkuara”, thuhet në deklaratë.
Një zyrtar amerikan dhe një zyrtar izraelit i thanë ‘The Times of Israel’ se Jerusalemi informoi Uashingtonin pasi u mor vendimi, por para se të ndodhnin sulmet.
“Ne u informuam”, tha zyrtari i administratës Trump, duke vënë në dukje se Qendra e Koordinimit Civilo-Ushtarak e udhëhequr nga SHBA-të në Kiryat Gat, e cila është përgjegjëse për mbikëqyrjen e armëpushimit dhe monitorimin e progresit në planin e paqes të Uashingtonit në Gaza, lehtësoi komunikimin midis dy palëve.
Një zyrtar izraelit tha se “pati diskutime me amerikanët” rreth përgjigjes së planifikuar izraelite para se të kryheshin sulmet. Sipas zyrtarit, diskutimet u zhvilluan si në nivelin politik ashtu edhe në atë ushtarak.