Dyshime për abuzime të palejuara të burimeve publike, mesazhe të supozuara nga VMRO-DPMNE për ngrohjen e marrëdhënieve me BDI-në, kush ka bërë më shumë e kush më pak për shqiptarët… E gjithë kjo është pjesë e “fushatës para fushatës”, një muaj para fillimit të saj zyrtar. Analistët kishin parashikuar më parë një fushatë të ashpër dhe të ndyrë, por nuk prisnin që hyrja në të të ishte e tillë – me goditje të ulëta dhe ndërskamsa.
Kandidati për kryetar të Çairit, Bujar Osmani, ndezi dje “fitilin”, duke komentuar deklaratën e kryeministrit Hristijan Mickoski – se opozita do të humbasë në zgjedhjet lokale në të gjitha komunat, dhe tha se pret që BDI të jetë një opozitë konstruktive në raport me shumicën e Badinterit, veçanërisht kur bëhet fjalë për ndryshimet në Kodin Zgjedhor. Osmani u përpoq të ngjallte dyshime te VLEN se partneri i tyre VMRO-DPMNE prapa skenave dëshiron ngrohjen e marrëdhënieve me BDI-në, shkruan DW.
“Kryeministri jep mesazhe të tilla publikisht, duke besuar se kjo do t’i ndihmojë partnerët e koalicionit, por mesazhe të tilla nuk i lëshon përmes kanaleve private. Mesazhe të tjera i dërgohen BDI-së për të ngrohur marrëdhëniet. BDI nuk do të krijojë treg për hyrje në qeveri, njëri del, tjetri hyn”, tha Osmani, duke theksuar se shqiptarët nuk do të lejojnë që askush t’i trajtojë si një “masë amorfe”, dhe Kryeministri të vendosë se kush do t’i përfaqësojë në qeveri.
Simbolika e fletës së bardhë
VMRO-DPMNE iu përgjigj menjëherë akuzave të tilla të Osmanit.
“Bujar Osmanit ose nuk iu tha, ose nuk dëshiron ta kujtojë kohën kur ekipi negociator i BDI-së la një fletë të bardhë letre para VMRO-DPMNE-së, i gatshëm të përmbushë çdo kërkesë vetëm për të mbetur në qeverinë që u mund në zgjedhje. Atëherë, udhëheqësit e BDI-së nuk tingëllonin dhe nuk silleshin aq trimërisht, të cilët tani po rrahin gjoksin kaq fort. Osmani mund të shtiret si parimor, por e vërteta është e qartë: maja e BDI-së është transformuar në një elitë milionerësh, ndërsa populli jeton në varfëri. Kjo është arsyeja pse sot BDI u premton funksione dhe hyrje në qeveri anëtarëve të saj të zhgënjyer, duke shpresuar se ata do të fshehin korrupsionin dhe marrëveshjet e tyre kriminale”, deklaroi VMRO-DPMNE dhe shton se ur Osmani flet për një “masë amorfe”, kjo është me të vërtetë thelbi i problemit.
“BDI e ka trajtuar komunitetin shqiptar si një masë amorfe për 20 vjet – si një makinë votimi për bizneset dhe marrëveshjet e tyre kriminale”, u përgjigj VMRO-DPMNE.
Përtej këtij shkëmbimi publik akuzash, sipas DW, burime në bllokun shqiptar spekulojnë se Osmani, me “kontributin” e tij në propozimin francez, është bërë një barrë ose pengesë për aftësinë e BDI-së për të rigjallëruar marrëdhëniet me udhëheqjen e VMRO-DPMNE-së, dhe ata e barazojnë inkurajimin e partisë për kandidaturën e tij me një “puthje Jude”.
“Kthimi në rrugën qendrore për BDI-në është më domethënës sesa një humbje në një komunë, veçanërisht nëse kjo humbje hap rrugën për rrëzimin nga froni të një personi”, thonë këto burime.
Votuesit do të vendosin se kush do të fitojë dhe kush do të humbasë, megjithëse kuzhinat e partisë ose makinat e propagandës po e përgatisin perceptimin me intensitet të pandërprerë, secili për fitoren e vet, shkruan DW.
Në një distancë higjienike
Në atmosferën e nxehtë parazgjedhore, ata që nuk janë pjesëmarrës të drejtpërdrejtë në garën zgjedhore janë gjithashtu shënjestra të sulmeve, gënjeshtrave dhe akuzave. Zëvendëskryeministri përgjegjës për qeverisjen e mirë, Arben Fetai, u ankua se makina propagandistike e BDI-së dhe mbështetësit e saj kanë nisur një fushatë të egër kundër tij, përmes profileve të rreme. Ai u përgjigj publikisht se është më krenar për tre gjëra në politikë: nuk ka keqpërdorur asnjë denar të burimeve publike, askush nuk mund të kushtëzojë, shantazhojë ose ndikojë në vendimet e tij, dhe është i vetmi që nuk ka pasur kurrë kontakt, bashkëpunim ose kompromis me BDI-në dhe presidentin e tyre.
“Kam mbajtur dhe do të mbaj një distancë higjienike prej tyre, sepse t’u afrohesh do të thotë të jesh i njollosur nga prishja e tyre morale”, tha Fetai.
Latif Arifi, koordinatori për komunikim dhe media në Qeveri, vlerësoi se fakti që BDI është sot në opozitë nuk është rastësi, por sepse qytetarët kanë ndëshkuar një model të lodhur qeverisjeje, i cili për 20 vjet nuk ka sjellë as zhvillim dhe as barazi, por vetëm korrupsion, pasurim personal dhe ngecje.
“Në këto zgjedhje lokale, shqiptarët kanë mundësinë ta përfundojnë këtë cikël. BDI duhet të kthehet në opozitë në nivel lokal. Dhe kjo nuk është hakmarrje politike, por një domosdoshmëri shoqërore. Me vetëm katër vjet të kaluara në opozitë, kjo parti mund të ketë një shans për t’u pastruar nga brenda, për t’u reformuar dhe për të ardhur me njerëz të rinj dhe profesionistë. Sepse shqiptarët janë lodhur duke parë të njëjtat fytyra në skenë gjithë jetën e tyre”, shkroi Arifi në një artikull.
Shkaqet dhe pasojat
Në periudhën parazgjedhore, ka edhe një demistifikim joformal të arsyeve pse Aleanca për Shqiptarët e udhëhequr nga Arben Taravari u largua nga koalicioni qeverisës dhe iu bashkua Frontit Evropian. Vëmendja është në kontratën e dështuar me “Gjoka Construction” – kompaninë nga Shqipëria që duhej të menaxhonte parkingun e Qendrës Klinike. Sipas VLEN, Taravari nuk u largua nga pushteti për shkak të parimeve apo interesit të qytetarëve, por “për shkak të marrëveshjeve të pista personale që zbuluan fytyrën e tij të vërtetë: një politikan i gatshëm të shesë gjithçka për përfitime personale.”
“Duke i shërbyer Ahmetit dhe Grubit, ai tradhtoi idealet për të cilat dikur thirrej dhe e identifikoi veten me ato që qytetarët shqiptarë i ndëshkuan më 8 maj”, theksoi VLEN.
AA, nga krahu i Taravarit, u bëri thirrje autoriteteve përmes institucioneve që të paraqesin publikisht të paktën një lidhje midis investitorit nga Shqipëria dhe Taravarit, shkruan DW.