Në pesë vitet e fundit, qytetarët dhe kompanitë maqedonase kanë investuar mbi 50 milionë euro në blerjen e apartamenteve dhe pasurive të tjera të patundshme në Greqi, sipas të dhënave nga Banka e Greqisë. Vetëm në vitin 2024, investimet arritën në 19 milionë euro, që është tre herë më shumë se në vitin 2021, kur u investuan 7 milionë euro.
Në vitin 2020, investimet maqedonase në pasuri të patundshme greke arritën vetëm në 2 milionë euro, por interesi për fqinjin tonë jugor është vazhdimisht në rritje. Sipas të dhënave të fundit, Maqedonia renditet e 25-ta në botë për sa i përket investimeve në pasuri të patundshme në Greqi.
Më shpesh, blerësit maqedonas kërkojnë apartamente me një sipërfaqe prej rreth 50 metrash katrorë, kryesisht në vende tërheqëse turistike. Disa nga këto investime, jozyrtarisht, nuk regjistrohen si investime të drejtpërdrejta maqedonase, sepse blerësit përdorin pasaporta të BE-së – më shpesh bullgare – ose investojnë përmes kompanive jashtë vendit të regjistruara në parajsa fiskale.
Nga rajoni, qytetarët bullgarë janë më të prirur të blejnë pasuri të patundshme në Greqi, ndërsa nga zona më e gjerë evropiane, qipriotët dhe turqit janë më të prirur. Tregu grek i pasurive të patundshme vazhdon të jetë tërheqës për shkak të taksave të ulëta për blerësit e huaj, klimës së mirë dhe afërsisë me vendet e Ballkanit./GazetaFAKTI