Kryetari i Aleancës për Shqiptarët, Zijadin Sela, e vlerësoi si konfuze dhe të pavërtetë njoftimin e njërit prej udhëheqësve të VLEN-it Izet Mexhitit se është e mundur që Aleanca të bëhet pjesë e Qeverisë. Ai theksoi se gjithmonë ka vepruar me ndershmëri për të mbrojtur të drejtat e shqiptarëve, dhe jo për privilegjet e qeverisë.
“Ju në komunikim me mua – JO. Unë si pjesë e qeverisë – JO. Unë në anën e atyre që duan të anulojnë të drejtat tona si popull – JO”, shkroi Sela në Facebook.
Ai thotë se i mat arritjet politike bazuar në kontributin për barazinë e shqiptarëve, dhe jo në interesat e qeverisë.
Sela paralajmëron se puna në parlament do të vazhdojë si gjithmonë, ballë për ballë me Qeverinë, me qëllim mbrojtjen e interesave të qytetarëve shqiptarë.
Zëvendëskryeministri dhe një nga udhëheqësit e koalicionit “Vlen”, Izet Mexhiti, në një deklaratë për TV “21” nuk e përjashtoi mundësinë që politikanë nga Aleanca Kombëtare për Integrim , e udhëhequr nga BDI, përfshirë Zijadin Selën dhe krahun e tij të Aleancës për Shqiptarët, të bëhen pjesë e Qeverisë.
Kohët e fundit, një zyrtar i lartë i VMRO-DPMNE-së la të kuptohej për “Sloboden Peçat” se është e mundur që një Aleancë e udhëhequr nga Sela të bëhet pjesë e qeverisë pas zgjedhjeve lokale. Por edhe atëherë, burime nga Aleanca i thanë gazetës “Sloboden Peçat” se nuk ka pasur sinjale apo kontakte midis VMRO-DPMNE-së dhe partisë së udhëhequr nga Sela për hyrje në Qeveri.