Stilisti ukrainas i modës Viktor Anisimov, i cili punoi për kostumin e Presidentit Volodymyr Zelensky, thotë se stili më formal që Zelensky zgjodhi për vizitën e tij në Shtëpinë e Bardhë ishte planifikuar paraprakisht dhe nuk ishte vetëm një reagim ndaj kritikave që mori pas takimit në shkurt në Zyrën Ovale, shkruajnë mediat ukrainase.
Anisimov shpjegon se ata kishin punuar për pamjen e re që nga janari, përpara se të dilnin kritikat për zgjedhjen e mëparshme.
Edhe pse Zelensky njihet për stilin e tij të thjeshtë dhe ushtarak, stilisti thotë se presidenti vendosi ta zhvillonte imazhin e tij me një kombinim formal.
Kostumi që Zelensky veshi në Shtëpinë e Bardhë, në tone blu dhe të zeza, fillimisht ishte projektuar për Ditën e Pavarësisë së Ukrainës.
“Ne nuk menduam për simbolikën politike të veshjes, por se si do të dukej dhe do të ndihej presidenti me atë kostum,” tha Anisimov.
Sipas tij, stili formal ishte pjesë e një strategjie më të gjerë që përfshinte imazhin e Zelensky në skenën politike botërore, veçanërisht në dritën e përpjekjeve të tij për t’i dhënë fund konfliktit në Ukrainë pa lëshime territoriale dhe pa revokuar anëtarësimin në NATO.
Edhe pse moda u bë një temë qendrore diskutimi, Anisimov theksoi se nuk ishte i shqetësuar për vëmendjen politike që tërhoqi vendimi i Zelensky-t për veshjet.
“Jam më i interesuar se kush do të jetë me ne si vend sesa çfarë veshi Zelensky”, tha stilisti, duke theksuar se rezultati i takimit dhe e ardhmja e Ukrainës janë shumë më të rëndësishme për të.
Vendimi për një stil më formal ishte pjesë e një strategjie më të gjerë nga Zelensky për ta portretizuar Ukrainën si një komb të vendosur dhe serioz në skenën politike globale./GazetaFAKTI