Presidenti i SHBA-së, Donald Trump, ka ngritur një padi prej 10 miliardë dollarësh kundër Dow Jones, kompanisë që zotëron “Wall Street Journal”, dhe pronarit të saj, Rupert Murdoch.
Padia bazohet në shpifje të dyshuar dhe shkelje të ligjeve për shpifjen, lidhur me një artikull që pretendonte se Trump i dërgoi një mesazh “të pahijshëm” shkelësit seksual Jeffrey Epstein.
Sipas gazetës, Trump i dërgoi një kartolinë ditëlindjeje financierit të ndjerë në vitin 2003, për ditëlindjen e tij të 50-të, përpara se Epstein të akuzohej për krime seksuale. Trump pretendon se mesazhi është “i rremë”.
“Sapo kemi ngritur një padi të fuqishme kundër të gjithë atyre që janë përfshirë në botimin e artikullit të rremë, dashakeq dhe shpifës në gazetën pa vlerë, Wall Street Journal”, shkroi Trump në rrjetet sociale.
Ai shtoi se gazeta dhe Murdoch, me të cilin ajo ka pasur një marrëdhënie të paqëndrueshme prej dekadash, u paralajmëruan se do të paditeshin nëse do ta publikonin artikullin.
Një zëdhënës i Dow Jones tha se kompania mbështet saktësinë e raportimit të saj.
“Kemi besim të plotë në hollësinë dhe saktësinë e raportimit tonë dhe do të mbrohemi fuqishëm kundër çdo padie”, thuhet në deklaratë.