Presidenti i SHBA-së, Donald Trump, e minimizoi rëndësinë e deklaratës së Presidentit Francez, Emmanuel Macron, se ai synon ta njohë Palestinën si shtet. Macron është “një djalë i mirë, më pëlqen”, tha Trump, por shtoi se “lajmi i mirë është se ajo që thotë është e parëndësishme”. Deklarata e presidentit francez “nuk ka peshë”, tha ai.
Të enjten në mbrëmje, Macron njoftoi në X se Franca do të njihte një shtet palestinez në shtator, kur të mbahet Asambleja e Përgjithshme e Kombeve të Bashkuara në Nju Jork. Pak kohë më vonë, Izraeli dhe Shtetet e Bashkuara e dënuan planin e tij.
Sekretari i Shtetit i SHBA-së, Marco Rubio, në X e përshkroi vendimin e Macron si “të pamatur” dhe tha se ai “e pengon paqen”. Kjo, shkroi Rubio, është një “shuplakë në fytyrë” për viktimat e masakrës nga Hamasi dhe grupet e tjera militante më 7 tetor 2023 në Izrael.
Sulmi, në të cilin u rrëmbyen më shumë se 250 persona, ndërsa u vranë më shumë se 1,200 të tjerë, shkaktoi një luftë në të cilën, sipas Ministrisë së Shëndetësisë së Gazës, deri më tani janë vrarë më shumë se 59,000 palestinezë.