Pentagoni e ka bllokuar në heshtje Kievin në përdorimin e sistemeve të raketave taktike ATACMS për sulme të thella brenda territorit rus, raporton Wall Street Journal, duke cituar zyrtarë amerikanë.
Pentagoni po bllokon në heshtje përdorimin e sistemeve amerikane të raketave taktike (ATACMS) nga Ukraina për sulme të thella në territorin rus, duke kufizuar aftësinë e Kievit për t’u mbrojtur kundër pushtimit të Moskës me ndihmën e këtyre armëve, shkroi të shtunën Wall Street Journal (WSJ), duke cituar zyrtarë amerikanë.
Sekretari i Mbrojtjes Pete Hegseth ka fjalën e fundit kur bëhet fjalë për përdorimin e sistemit ATACMS, sipas WSJ.
Zyra e presidentit ukrainas dhe Ministria e Mbrojtjes nuk komentuan shkrimin e WSJ, ashtu si Shtëpia e Bardhë dhe Pentagoni, thekson Reuters.
Trump shpresonte të organizonte një takim midis Putinit dhe Zelensky-t.
Lajmi për raketat me rreze të gjatë veprimi të SHBA-së vjen ndërsa Presidenti i SHBA-së Donald Trump po bëhet gjithnjë e më i frustruar me luftën trevjeçare dhe pamundësinë e tij për të siguruar një marrëveshje paqeje midis Rusisë dhe Ukrainës.
Pasi samiti i tij me Presidentin rus Vladimir Putin dhe takimet pasuese me udhëheqësit evropianë dhe Presidentin ukrainas Volodymyr Zelensky nuk arritën të jepnin ndonjë përparim të prekshëm, Trump tha të premten se po shqyrtonte vendosjen e sanksioneve ekonomike ndaj Rusisë ose braktisjen e procesit të paqes.
“Do të marr një vendim për atë që do të bëjmë dhe do të jetë një vendim shumë i rëndësishëm, nëse do të vendosim apo jo sanksione gjithëpërfshirëse apo tarifa masive, ose të dyja, ose ndoshta nuk bëjmë asgjë dhe themi, ‘Kjo është lufta juaj'”, tha Trump.
Trump kishte shpresuar të organizonte një takim dypalësh midis Putinit dhe Zelensky-t, por kjo gjithashtu ka rezultuar shumë e vështirë.
Ministri i Jashtëm rus Sergei Lavrov i tha NBC-së të premten se nuk ka një axhendë të dakorduar si parakusht për t’u ulur me Zelensky-n.
“Putin është gati të takohet me Zelensky-n kur të miratohet axhenda e samitit. Dhe nuk është gati ende”, tha Lavrov, duke shtuar se një takim i tillë nuk është planifikuar për momentin.
Putin ka paralajmëruar vazhdimisht se ushtria ukrainase nuk mund të përdorë armë me precizion të lartë dhe me rreze të gjatë veprimi pa pjesëmarrjen e drejtpërdrejtë të oficerëve të NATO-s.
Kjo, siç theksoi ai, do ta përfshinte Perëndimin drejtpërdrejt në luftën kundër Rusisë.