Gjykata e Apelit e Bosnjës dhe Hercegovinës miratoi sot (1 gusht) një vendim përfundimtar dhe dënoi Presidentin e Republikës Srpska, Milorad Dodik, me një vit burg dhe gjashtë vjet ndalim të aktivitetit politik për moszbatimin e vendimeve të përfaqësuesit të lartë ndërkombëtar Christian Schmidt.
Dodik do të duhet të ndalojë së mbajturi detyrën e Presidentit të Republikës Srpska për 6 vjet, shpjegoi Gjykata, duke deklaruar se kjo është një masë mbrojtëse. Gjykata e BiH në këtë mënyrë konfirmoi vendimin e shkallës së parë dhe hodhi poshtë ankesat e mbrojtjes së Dodik dhe të Prokurorisë së Bosnjës dhe Hercegovinës.
Milorad Dodik iu drejtua publikut pasi u konfirmua vendimi i tij.
“Ky është një vendim thjesht politik, një vullnet politik. Gjykata e BiH është një gjykatë politike dhe ka vendosur të ndikojë në jetën politike”, theksoi Dodik, duke shtuar se vendimi i sotëm nuk e ka habitur. Ai pretendon se ai, si President i RS, u akuzua për gjithçka dhe u shndërrua në fajtorin kryesor, raporton Telegraf.
Ai beson se Bashkimi Evropian qëndron pas sulmit ndaj tij dhe u shpreh se të gjithë gjyqtarët që e dënuan ishin myslimanë. “Prokurori është mysliman, gjyqtari i parë është mysliman, gjyqtari i dytë është mysliman, në dhomën e apelit ka dy myslimanë. Nuk mund të prisni asgjë tjetër. Ne nuk do të hezitojmë të mbrojmë Srpska-n, por paqen. Të gjitha vendimet tona do të jenë politike”, njoftoi ai, transmeton Index.hr.
Përfaqësuesi i Lartë në Bosnjë dhe Hercegovinë, Christian Schmidt, reagoi ndaj vendimit kundër Presidentit të BiH, Milorad Dodik.
“Vendimet dhe gjykatat duhen respektuar”, tha Schmidt në një përgjigje të shkurtër ndaj pyetjes së një gazetari dhe ‘Detektor’.
Pasi u konfirmua vendimi i shkallës së parë në çështjen kundër Milorad Dodik dhe Milos Lukiç, reagimi erdhi nga Ambasada e Britanisë së Madhe në Bosnjë dhe Hercegovinë.
“Mbretëria e Bashkuar e bën të qartë se vendimi i Gjykatës duhet të respektohet plotësisht. Të gjitha institucionet dhe aktorët përkatës duhet të mbështesin sundimin e ligjit dhe të veprojnë pa vonesë në përputhje me vendimin, sipas udhëzimeve të Gjykatës”, thuhet në një postim në X, i cili u transmetua nga vetë Ambasadori Julian Reilly.