Qeveria shqiptare synon të përmirësojë infrastrukturën teknologjike në shkolla deri në vitin 2030, për të cilën planifikon të investojë 5.5 miliardë lekë (mbi 57 milionë euro).
Për këtë qëllim, Ministria e Arsimit dhe Sportit ka paraqitur për konsultim publik një draft dokument për dixhitalizimin e arsimit të lartë dhe parauniversitar në 5 vitet e ardhshme, si një kusht themelor për procesin e integrimit të vendit në Bashkimin Evropian.
-Fondet janë të destinuara për 654 laboratorë inteligjentë në 615 shkolla, duke siguruar laptopë për 5,500 mësues, duke përmirësuar aksesin në internet me brez të gjerë dhe duke krijuar platforma qendrore për menaxhimin e informacionit akademik dhe shkencor, raportoi abcnews.al.
Sipas planit të propozuar, iniciativa e laboratorëve inteligjentë do të vazhdojë në të gjitha shkollat fillore dhe të mesme në vend. Pritet që 32 milionë lekë të financuara nga buxheti i shtetit dhe partnerët ndërkombëtarë të ndahen për projekte pilot, me qëllim përfshirjen e inteligjencës artificiale në mësimdhënie.
-Programi përfshin gjithashtu trajnimin e 16 mijë mësuesve me 10 module të teknologjisë së informacionit dhe komunikimit dhe ndërtimin e një platforme dixhitale të dedikuar për trajnimin e mësuesve, për të cilën parashikohen 417 milionë lekë, nga buxheti i shtetit dhe donatorët. Ndër qëllimet është zgjerimi i rrjetit Wi-Fi, internetit të shpejtë pa tel, në të gjitha institucionet e arsimit fillor, të mesëm dhe të lartë, shton televizioni.
Teksti i propozuar i draftit përmend edhe çështjet e ndjeshme të kohëve të fundit që lidhen me rreziqet e ekspozimit të fëmijëve ndaj internetit, i cili parashikon “marrjen e masave specifike dhe rritjen e ndërgjegjësimit në shkolla për të parandaluar ngacmimin kibernetik”.
Lidhur me arsimin e lartë, strategjia e re synon të përmirësojë lidhjen e universiteteve me tregun e punës. Në këtë drejtim, institucionet e arsimit të lartë duhet të reformohen dhe të ofrojnë programe që janë më të orientuara drejt nevojave të industrisë dhe punës, gjë që do të rrisë mundësitë për punësim të menjëhershëm të të diplomuarve. MIA